Prava olish tartibi 2026: hujjatlar, narxi va bosqichlar

Ketma-ketlik qat'iy. Tibbiy ma'lumotnomasiz avtomaktab hujjat rasmiylashtirmaydi, avtomaktab guvohnomasisiz imtihonga yozilib bo'lmaydi (A1dan tashqari), nazariy imtihondan o'tmasdan amaliyga qo'yishmaydi.

Jarayonni Yo'l harakati xavfsizligi xizmati (YHXX) nazorat qiladi: imtihonni uning ro'yxatdan o'tkazish va imtihon olish bo'linmalari yoki belgilangan talablarga javob beradigan xususiy markazlar oladi. Guvohnomaning o'zi esa davlat boji to'langanidan keyin rasmiylashtiriladi.

2026-yil 1-yanvardan haydovchilik guvohnomasida yangi kichik toifa bor — A1, moped va skuterlar uchun. A1ni 16 yoshdan olish mumkin va buning uchun avtomaktabda o'qish talab qilinmaydi: nomzod mustaqil tayyorlanib, to'g'ridan-to'g'ri nazariy va amaliy imtihonlarga yoziladi.

A (mototsikl) va B (yengil avtomobil) toifalari — 18 yoshdan. Sizda allaqachon A, B, C yoki D bo'lsa, A1 avtomatik ochiladi, alohida imtihon topshirmaysiz.

A1da o'tish bali ham past: 20 savoldan 16 tasi yetarli, ya'ni 4 xatoga ruxsat. Qolgan barcha toifalarda — 18 ta to'g'ri javob.

• Shaxsni tasdiqlovchi hujjat — pasport yoki ID-karta.
• 083/h shakldagi tibbiy ma'lumotnoma — ko'z shifokori, terapevt, LOR shifokori va nevrolog ko'rigidan keyin my.gov.uz orqali rasmiylashtiriladi.
• Avtomaktabni tugatganlik haqidagi guvohnoma — endi elektron, qog'oz nusxa kerak emas. A1 toifasiga bu hujjat talab qilinmaydi.

yim.uz orqali yozilganda hujjatlar saytga .jpeg yoki .png ko'rinishida yuklanadi. Imtihon kuni pasport va tibbiy ma'lumotnomaning asl nusxasi bilan borish shart, avtomaktab guvohnomasi esa tizimda elektron tekshiriladi. Vaqtni imtihon boshlanishiga 24 soat qolgunga qadar o'zgartirish mumkin; markazga 15 daqiqa oldin yetib borish kerak.

2026-yil 1-fevraldan A va B toifasiga nomzodlar majburiy o'quv dasturining nazariy qismini mustaqil o'zlashtirishi mumkin. Amaliy tayyorgarlik hamon litsenziyalangan avtomaktabda o'tiladi. Guruhlarni YHXXda ro'yxatdan o'tkazish bekor qilindi, guvohnomalar elektron shaklga o'tdi.

Bu yangilik internetda «nazariy imtihon bekor qilindi» degan shaklda tarqaldi. Unday emas. Bekor qilingani — darsxonada o'tirish majburiyati, imtihonning o'zi emas. Nazariy imtihon o'sha joyda, o'sha formatda turibdi.

Bu yerda ikkita butunlay boshqa to'lovni ajratish kerak, chunki ular turli manzilga ketadi. Birinchisi — imtihon uchun to'lanadigan haq; quyidagi jadvalda Yagona imtihon markazining (YIM, yim.uz) tariflari berilgan. Ikkinchisi — haydovchilik guvohnomasi rasmiylashtirilganda davlatga to'lanadigan boj.

YIM tariflari 2026-yil 6-yanvardan kuchga kirdi. Ilgari ikkala imtihon uchun jami 2 mln so'm to'langan, endi 3 mln. Qayta topshirish 1,2 mln so'mdan 1,6 mln so'mga chiqdi — bir marta yiqilish sizga bitta imtihonning o'zidan qimmatroqqa tushadi.

Guvohnomani birinchi marta rasmiylashtirish uchun davlat boji 2026-yilgi BHMdan hisoblanadi: BHM 440 000 so'm, 1,4 BHM = 616 000 so'm, to'lov my.gov.uz orqali. BHM o'zgarsa, summa ham o'zgaradi. YHXXning o'z ro'yxatdan o'tkazish va imtihon olish bo'linmalaridagi tarif e'lon qilinmagan — narxni bo'linmaning o'zidan so'rab aniqlaysiz.

Avtomaktab to'lovi bu ro'yxatga kirmaydi: u shartnoma asosida belgilanadi va maktabdan maktabga farq qiladi.

Imtihonlar YHXXning ro'yxatdan o'tkazish va imtihon olish bo'linmalarida yoki belgilangan talablarga javob beradigan xususiy imtihon markazlarida o'tkaziladi. Litsenziyalangan xususiy markazlardan biri — YIM: uning 14 ta hududiy markazi bor, Toshkent shahri va viloyatidan tortib Nukus va Termizgacha.

Nazariy imtihon kompyuterda o'tadi: 20 ta elektron (animatsiyali) savol, 25 daqiqa. Baholash avtomatik, imtihonchi ishtirokisiz. Til: o'zbek yoki rus. Xonaga adabiyot va qo'llanmalar, telefon va boshqa texnik vositalar olib kirish taqiqlanadi; boshqa nomzodlar bilan gaplashish ham mumkin emas.

Amaliy imtihon avtodromda, 100 ballik tizim bo'yicha: 100 balldan boshlaysiz, har bir xato ballingizni kamaytiradi.

Nazariy imtihonni qayta topshirish muddatida qoida bilan amaliyot bir-biriga to'g'ri kelmaydi. Davlat xizmatlari portalining (advice.uz) 144-xizmat kartochkasida qoida shunday: qayta topshirishga keyingi ish kuni ruxsat beriladi. yim.uz saytining savol-javob bo'limi esa takroriy imtihon yetti ish kunidan keyin belgilanishini yozadi va markazlar amalda ko'pincha shu muddatni beradi. Sana bo'sh o'ringa ham bog'liq, shuning uchun uni o'zingiz yoziladigan markazdan aniqlang.

Amaliy imtihonda muddat aniqroq: kamida 7 kalendar kun. Avtomaktab guvohnomasi amal qilar ekan, urinishlar soni cheklanmagan.

Yana uchta muddat esda tursin: nazariy imtihondagi ijobiy natija 2 oy amal qiladi va shu vaqt ichida amaliyni topshirmasangiz, nazariyni qaytadan topshirasiz; ikkala imtihonni topshirganingizni tasdiqlovchi imtihon sertifikati 1 yil — shu muddat ichida guvohnomani rasmiylashtirib olasiz; guvohnomaning o'zi 10 yil.

Shu uchta muddatni orqaga qarab rejalashtirgan ma'qul. Nazariyni topshirgan kuningizdan boshlab amaliyga ikki oy bor, amaliy urinishlar orasida esa kamida bir hafta o'tadi. Ikki marta yiqilsangiz, faqat kutishning o'zi kamida ikki haftani oladi, ustiga bo'sh sana topilishini kutish qo'shiladi — shuning uchun birinchi sanani imkon qadar erta oling.

Nazariyani mustaqil o'rganishga ruxsat berilgani tayyorgarlik yukini to'liq sizning zimmangizga o'tkazdi. Savollar bazasi ochiq e'lon qilinmagan: Vazirlar Mahkamasining 2022-yil 20-iyuldagi 393-son qaroriga ko'ra Ichki ishlar vazirligi kamida 1 000 ta animatsiyali savolni tasdiqlaydi, aniq ro'yxat esa hech qayerda chop etilmaydi. Shuning uchun hech qanday ochiq to'plamni davlat bazasi bilan solishtirib bo'lmaydi va hech bir baza o'zini «asl nusxa» deb atay olmaydi. Bizning to'plamimiz real imtihon savollari asosida yig'ilgan va muntazam yangilanadi.

AvtoPilot bazasida 1 235 savol va 124 ta mashq bileti bor. Ishlash tartibi oddiy:

• Mashq biletlarini ketma-ket ishlang — har birida 10 tadan savol, oxirgi 124-biletda 5 ta. 1-biletdan boshlash qulay.
• Qoqilgan mavzuni alohida mashq qiling: yo'l belgilari, o'tish huquqi, chorrahalar. Barcha mavzular ro'yxati shu yerda.
• Imtihon kuni tanish ekran oldida o'tirish uchun ilovada sinov imtihonlarini topshiring: 20 savol, o'sha 18 ballik chegara.

Imtihon kuni nima bo'lishi haqida batafsil — prava imtihoni 2026. Savollar mavzular bo'yicha qanday taqsimlangani — prava test savollari. Chorrahada tartibga soluvchi turgan bo'lsa, uning ishoralari svetofordan ustun — buni alohida qo'llanmada yozganmiz.